口快宣布參選 長毛愈描愈黑

口快宣布參選 長毛愈描愈黑 (明報) 05月 20日 星期二 05:05AM

【明報專訊】立會選舉就快殺到，但現時有意參選者都唔會咁坦白公開話一定參選，最多只講正在考慮，因為一旦講咗出口，就要開始計算選舉經費。噚日社民連立法會議員梁國雄在政制事務委員會會議上，一時口快快講咗自己會參選。長毛講完都知衰，馬上補鑊，話係參選下屆區議會至真。嘩！咁就真係愈補愈大鑊，而家起要計經費到2011年？！

話說噚日政制事務委員會討論立法會選舉安排，長毛講起建制派搞票站調查時，話呢樣嘢會影響到佢自己，因為佢將會參選。其實係人都知長毛會參選9月嘅立法會選舉，佢講完都即時醒水唔應該公開講出口，於是馬上話收番剛才嘅說話，然後又改口話係要參選下屆區議會。

政制及內地事務局長林瑞麟即笑說，長毛一宣布參選就要計選舉經費，不過區議會選舉經費上限得4萬元，點樣可以捱到2011年底，長毛就要自己處理啦。

職工盟李卓人就問到政府會唔會送紀念品鼓勵市民投票，同埋送啲咩，佢自己講完都笑自己cheap。政府回答會喺宣傳活動上派紀念品。

~ 妖!